Зам, тээврийн сайдын 2026 оны эхний шуурхай хуралдаан (2026.01.07) боллоо. Хурлын эхэнд Зам, тээврийн сайд Б. Дэлгэрсайхан Монгол Улсын Засгийн газраас 2026 онд баримталж ажиллах бодлого, чиглэлүүдийн талаар товч мэдээлэл өгч төрийн бүтээмжийг нэмэгдүүлэх, төрийн үйлчилгээг иргэдэд хүндрэл чирэгдэлгүй хүргэж ажиллахыг санууллаа.

Тухайлбал, Засгийн газрын 2025 оны 12 дугаар сарын 18-ны өдрийн хуралдаанаар Мэргэжлийн хяналтын байгууллагын үйл ажиллагааг эргэн сэргээх шийдвэр гарсантай холбогдуулан салбарын хяналт шалгалтын хэрэгжилтийг хангах, хяналтын болон судалгаа шинжилгээний ажилтнуудыг буцаан МХЕГ-т төвлөрүүлэх ажлын хүрээнд мэргэжилтнүүдийн чиг үүргийн давхардлыг арилгах, төрийн байгууллагын менежментийг сайжруулах чиглэлд холбогдох газрын дарга нарыг анхаарч ажиллахыг үүрэг болголоо.

Ерөнхий сайд Г.Занданшатар шинэ оны эхэнд буюу 2025.01.05-нд Хөвсгөл аймгийн Шинэ-Идэр сумын иргэдтэй уулзсан. Уг уулзалтаар орон нутгийн иргэд ажлын байрны хүрэлцээ хангамж дутагдалтай байгаа талаар санал хүсэлт их тавьсан байна. Иймд хөдөө орон нутагт үйл ажиллагаа явуулж буй төрийн өмчит компаниуд орон нутгийн иргэдийг ажлын байраар хангах асуудалд анхаарч ажиллахыг үүрэг болголоо. Энэ хүрээнд “Монголын төмөр зам” ТӨХК-ийг говийн бүсийн аймаг сумдаас иргэдийг ажлын байраар ханган ажиллах чиглэлд тусгай бодлого баримтлан ажиллахыг сануулав.

Мөн Засгийн газрын 2026.01.07-ны өдрийн хуралдаанаар Тавантолгойн бүлэг ордын Бортээг хэсгийг эдийн засгийн эргэлтэд оруулахтай холбогдуулан “Монголын төмөр зам” ТӨХК-ийн гүйцэтгэх захирал О.Батчулуунд Бортээгийн нүүрсний экспортыг ажиллуулж эхлэхэд хилийн боомтын гарцуудыг ашиглах, бэлтгэл ажлыг хангах, зохион байгуулалтад анхаарч ажиллахыг үүрэг болголоо.

Зам, тээврийн салбарын төрийн өмчид компаниудад Төрийн хэмнэлтийн тухай хууль, байгууллагын дотоод үйл ажиллагаа, компанийн менежментийг сайжруулах ажлын хүрээнд хөдөө орон нутагт ээлжийн системээр ажилладаг алба хаагчдын орон тоог багасгах, хариуцлагыг дээшлүүлэх, хяналт шалгалтыг сайжруулах, чиг үүргийн давхардлыг арилгах хүрээнд бүтэц орон тоонд дахин анхаарч ажиллахыг анхааруулав.